Sijbren Sijtsma

Foar Fryslân

2010-05-03T23:12:00.008+02:00

Al it praten oer de opheffing fan Fryslân moat stopje. Fryslân wol net opgean yn in grutte noardlike provinsje mei Grins en Drinte. Wa moat dan noch de Fryske taal en kultuer beskermje? Fine jo dat ek? Tekenje dan de petysje op www.foarfryslan.nl Dan binne jo foar it behâld fan de provinsje Fryslân. Jou in sinjaal oan de polityk. Dit giet te fier. Tekenje!

De Fermanje fan Drachten

2010-03-25T22:18:00.008+01:00

Drachten hat noch inkele monuminten. Midden yn Drachten, op in stil plakje oan de drokke Súderbuurt, stiet it âlde smûke tsjerkegebou fan de Menniste Gemeente Drachten-Oerterp, ek wol nommen de Fermanje. De tsjerke hat in ienfâldich foarkommen. It waard boud in 1790. Op it dak pronkje twa moaie wynwizers, in hynder en in skip. Hja steane symboalysk foar twa wichtiche beroppen dy’t Drachten doetiids kende – en wêrút de gemeente ûntstien is -, nammentlik de boeren en de skippers. Links neist de Fermanje de yntiid ynwindich ferboude, tsjerkeriedskeamer en de kosterskeamer.

Yn 2008 waard it ynterieur grûnich ferboud en foar in part yn de âlde steat wêrom brocht. Op 'e muorre stiet de âlde doperske "fermoanning" (vermaning):

Daer en mach gheen ander Fundament gheleyt worden Behalven datter gheleyt is, het welce is Christus Jezus.

FNP-Smellingerlân giet der wer tsjin oan

2010-03-20T21:36:00.007+01:00

De FNP is yn de ried fan Smellingerlân fan ien nei twa sitten gien. In ferdûbeling. Ik nim de twadde sit yn njonken ús listlûker Durk Oosterhof. By de gemeenteriedferkiezings fan 2006 helle de FNP yn Smellingerlân 1024 stimmen, dat wie doe 3,8 persint en goed foar ien sit. Op 3 maart 2010 hat de FNP 1508 kiezers lútsen, 6,3 persint fan alle stimmen, wêrmei no twa sitten behelle waarden. Foar de argivarissen ûnder ús: de opkomst yn Smellingerlân wie yn 2010 56,6 persint fan alle kiesrjochthawwers, de kiesdieler foar ien sit wie 780 stimmen en dan smiete 1508 stimmers krekt 1,93 sitten foar de FNP-Smellingerlân op. Op 11 maart 2010 binne wy as riedsleden ynstallearre, fanôf dizze wike fine de earste gearkomsten fan de nije rie wer plak. Wy beide sille besykje it FNP lûd ek in de perioade 2010-2014 wer yn de ried hearre te litten. Nochris tankewol foar it fertrouwen!

(auteursrjocht foto: Ljouwerter Krante)

Made in GDR (1)

2010-03-20T17:43:00.012+01:00

In Erika Modell 30 út 1971, in deeglike skriuwmasine út de froegere DDR. Dizze typmasines waarden makke troch VEB Schreibmaschinenwerk Dresden. Lykwols de plastic útstrieling, krige de searje E30/40 yn 1965 op de Leipziger Frühjarsmesse in “Goldmedaille”, in echte sosjalistyke typmasine dus. It saneamde “kubistyske” ûntwerp wie fan Gerhard Schöne.

It jongerein oer alkohol en drugs

2010-03-20T14:16:00.010+01:00

Op inisjatyf fan de Jeugdrie Smellingerlân, wie der op freedtejûn 19 maart in debatjûn organissearre oer alkohol en drugs. Lokaasje wie it nije jongereinsintrum Place 2 Be yn Drachten. Ùtnoege wie in grut tal jongeren, in previnsjemeiwurker fan de VNN (Ferslavingssoarch Noard-Nederlân) en de riedsleden. Ik sels wie ek oanwêzich.

In nijsjirriche jûn dy’t my learde dat it gebrûk fan alkohol en drugs nea sûnder gefaren is. It jongerein kaam oan it wurd en dúdlik waard dat in soad fan harren wolris drinke of inkeld in jointsje smoke. Guon dogge dit om’t men har troch drank of it smoken oars fielen giet. Mar de previnsjemeiwurker wiisde derop dat it smoke fan in jointsje skealiker is dan it smoken fan in sigaret. Út ûndersiik hat bliken dien dat in persoan dy’t eltse dei trije jointsjes smookt, likefolle giftiche stoffen binnenkrijt as ien dy’t eltse dei in pakje mei 20 sigaretten brûkt. Softdrugs as hasj en wiet kinne faaks ek net mear “soft” nommen wurde om’t der hjoeddeis stoffen oan tafoege wurde dy’t meitsje dat dizze drugs eins hast “harddrugs” binne. Yn it bysûnder waard wiisd op de gefaren fan GHB, dat in sterke wurking hat en kleur- en rookleas is en ûngemurken yn bygelyks it drinken dien wurde kin.

Fansels brûke net alle jongeren alkohol en drugs. En in soad jongeren brûke ek allinne mar insidenteel. Yn it gesprek kaam nei foaren dat hja eksperimintearje út ynteresse en soms ek ûnder druk fan leeftydsgenoaten. By insidenteel gebrûk hoege de âlden harren dan ek gjin soarchen te meitsjen, al soe it wol goed wêze dat de âlden besykje te praten oer it drugsgebrûk. Dat bart noch net faak, sa die bliken. Hast eltse jongere komt wolris yn kontakt mei drugs en hja sille dan beslúte moatte wat te dwaan. In oantal jongeren, mar net allegearre, fûn dat problemen tefoaren komme wurde kinne troch ynformaasje. De VNN-meiwurker joech ek oan dat wannear’t it gesprek al oangien wurd foardat it jongerein yn ‘e kunde komt mei drugs, der mear romte ûntstiet foar in iepen gesprek.

Eltsenien fûn dat wannear it gebrûk regelmjittich plakfynt of de jongere begjint te eksperimintearjen mei harddrugs, de situaasje slimmer wurd. Yndruk is dat dizze soarte fan drugsgebrûk gearhinget mei in leech selsbyld of in flecht is foar problemen. Faak binne der by problematysk drugsgebrûk swierrichheden thús of op skoalle. Ynienen in feroaring fan it gedrach of oare freonen, ferjitlikens of lichaamlike klachten (benammen sliepproblemen en wurgens) binnen oanwizings foar ûnferantwurdlik drugsgebrûk. Dizze groep jongeren is net sa grut, mar soarget wol foar “wurk oan de winkel”. Yn it foarste plak leit hjirre in rol foar de âlden – dy’t dúdlike grinzen stelle moatte-, yn it twadde plak ek foar de skoallen en de professionele helpferliening. Mar ek de pleatslike polityk moat hjirre wat betsjutte.

Neffens de FNP-Smellingerlân is it oerlêstferoarsaakjende drugsgebrûk yn Smellingerlân relatyf beheind en kin – mar dit jildt ek foar it “rekreatyve” drugsgebrûk - eins net ferhindere wurde. De oerheid moat dus altyd soargje foar in kombinaasje fan maatregels: as der it tinken is dat op ferskate plakken drugs problematysk brûkt wurde, dan kontrolearre en yn aksje komme. Mar ek regelmjittich kontakt hawwe mei it jongerein en har stipje by it útfieren fan de regels fan de gemeente. It jongerein sil sa ek de gemeente gauer yn 'e mjitte komme.